列斯聯今季喺英冠成績突出，來季甚有機會重返英超，以色列翼鋒文諾索羅門（圓圖）功不可沒。早前有傳熱刺打算將佢提早回收，不過熱刺主帥普斯迪高路已經親口否認，文諾索羅門可以專心為列斯聯爭升班。
熱刺否認回收
25歲嘅文諾索羅門今季由熱刺外借到列斯聯，21次上陣交出5個入波同5次助攻，表現唔曳，由於熱刺近期鬧前鋒荒，加上成績不濟，傳聞佢哋考慮提早回收文諾索羅門或外借至西甲基羅納嘅拜仁基爾作救亡，不過教頭普斯迪高路尋日透露，回收借將並唔係球會計劃之內。
列斯聯今晚作客升班潛在對手般尼，對爭取來季重返英超相當關鍵，文諾索羅門賽前就話好有信心全取３分：「記得首循環碰頭時，因為自己嘅犯錯搞到球隊輸波，不過列斯聯係表現更好嘅一方，全場控制戰局兼有大量入波機會，如果我哋可以踢番嗰場嘅水準，我好肯定列斯聯今晚可以贏波而回。」