周二凌晨意甲賽事，國際米蘭將會喺主場撲擊科木，睇牌面「藍黑兵團」當然秤高一線，不過佢哋存有隱憂，就係對住主守嘅球隊甚少大勝，而且科木近期走勢唔差，防守演出夠硬淨，國米想入波都要花一定力氣，預料今場入波唔會多，3/3.5球入球細值得捧場。（周二凌晨3時45分開賽）
國際米蘭自從歐聯輸畀利華古遜之後，近2仗都能夠派蛋贏波，包括聯賽6比0擊敗拉素，以及意大利盃贏烏甸尼斯2比0，踢法相當穩陣。
發電機倦勤影響攻力
呢支「藍黑兵團」雖然擁有星級鋒線，不過主場對住主守球隊唔係咁易攻得入，贏波通常都係1球起2球止，近6場主場出擊，當中有5場總入球開2球或以下，而且中場發電機尼高路巴列拿大腿受傷上陣成疑，令創造力大大減弱。
另邊廂，作客嘅科木雖然實力有限，不過近期憑住堅固嘅防守，踢出唔錯成績，近5場賽事只係輸過1場，其中4場總入球開2球或以下，包括上輪爆冷2比0擊敗羅馬。科木球員依家信心爆棚，今場將會繼續屯重兵防守博偷雞，國米想撕破科木防線有一定難度，開3/3.5球入球細機會甚高。