今晚英超重頭戲，熱刺主場迎戰曼聯，兩隊今季演出如同難兄難弟，主隊熱刺排喺第14位，落後曼聯兩分，為咗挽回面子雙方都冇得退縮，估計戰況激烈。文:謝德謙
熱刺今季出戰多條戰線，近期喺英聯盃以0比4不敵利物浦，以及英足盃以1比2輸畀維拉，雖然上輪聯賽作客以2比0擊敗賓福特，但接連兩項盃賽相繼出局，令主帥普斯迪高路相當頭痕。熱刺今晚主場出擊想重返勝軌，就要寄望以隊長孫興民為首嘅前鋒線，球隊至今取得48個聯賽入球，攻力有一定保證，要爭取入波難度不大。
近年交鋒例多波入
曼聯上輪聯賽以0比2不敵水晶宮，雖然之後喺英足盃擊敗李斯特城驚險晉級，但主帥魯賓艾摩廉深知聯賽重要性，如果今場再輸更會被對手過頭，可能以攻代守。上場英足盃成為絕殺英雄嘅中堅哈利馬古尼，有望藉死球再次取得入球，始終熱刺今季防守未如理想，只要前鋒海倫及阿密特迪亞路多啲起腳，有望延續近3次交手例多波入嘅「傳統」，球迷有望睇入球騷。