意甲「米蘭打吡」，AC米蘭掛名主場鬥國際米蘭。今場係今季第3次米蘭打吡，上個月意超盃決賽AC米蘭贏波捧盃，信心爆棚，不過國際米蘭依家同拿玻里喺榜首叮噹馬頭，搶分心切，肯定唔會客氣同你鬥攻，雙方近4次交手全開3球或以上，2.5球入球大係必然之選。（HOY TV 76台周一凌晨1時直播）文:渡邊年
今場係今季第3次「米蘭打吡」，除咗上個月喺沙特踢嘅意超盃，AC以3比2反勝國米捧盃外，聯賽首循環AC亦以2比1擊敗「藍黑兵團」，今晚再度交手，心理上有一定優勢。
今輪意甲開波前，AC雖然有34分排第7，但同國米有16分距離，幸好同第4位嘅拉素只相差5分，歐聯席位仍然伸手可及，「紅黑軍」教練沙治奧干斯卡奧球員時代曾經為國際米蘭於聯賽上陣41次，絕對明白「米蘭打吡」嘅重要性，如果今場贏波，佢更會成為35年嚟，第2位AC教練可以首度執教就聯賽雙殺國米。
藍黑兵團復仇誓駁火
國際米蘭未能於意超盃4連霸，今場復仇心切，除咗「米蘭打吡」嘅歷史意義外，實際上佢哋極需要呢3分，追趕榜首嘅拿玻里。好彩國米鋒線人材濟濟，馬古斯杜林同拿達路馬天尼斯弗到漏，球隊聯賽21戰射入55球，亦係自1961年以嚟，呢個階段入球數字最高，大把本錢同AC鬥攻，事實上近年「米蘭打吡」都極開放，近4次交手全開3球或以上，入球大放心捧。