雙紅會大激鬥利物浦主場迎戰曼聯，雙方狀態此起彼落，利物浦士氣如虹，各項賽事已經23場不敗，目前高踞聯賽榜首，相反4連敗嘅曼聯，真係頭頭碰着黑，跌到第14位，宿敵對決只能靠戰意搭夠。文:謝德謙
「紅軍」上輪聯賽作客以5比0大勝韋斯咸，路易斯迪亞斯、加普、沙拿、阿歷山大阿諾特及迪亞高祖達各建一功，主帥施洛賽後大讚球隊表現，而且指出後防不失球係贏波基礎。「紅軍」近3戰英超全勝入14球，一眾中前場球員狀態火熱，射手沙拿今場大把機會爭取士哥。
防線欠穩難守沙拿
「紅魔鬼」近況奇差，上輪聯賽以0比2不敵紐卡素，聯賽3連敗兼1球不入。球隊已經陷入信心危機。今場雖然有隊長般奴費南迪斯刑滿復出，但係後防整體表現不佳，加上曼聯近季作客利物浦未曾取勝，球隊近期狀態差勁，相信「紅軍」大有機會全取3分。