歐聯第6輪賽事，「1哥」利物浦作客對西甲球隊基羅納。「紅軍」今季霸氣十足，係歐聯唯一全勝球隊，當中對手包括皇家馬德里、AC米蘭同利華古遜等頂級隊伍，贏得極具說服力；相反「新丁」基羅納實力同經驗不足，頂唔住利物浦強攻，捧半場客勝。 （Now 643周三凌晨1時45分直播）
利物浦目前5戰全勝排榜首，同第9位有5分距離，今輪再贏嘅話，大有機會提前鎖定直接晉級16強名額，肯定唔會錯失良機。埃及神鋒穆罕默德沙拿狀態正處於巔峰，加普、達雲紐尼斯及路易斯迪亞斯等攻擊球員都威力十足，而且上場聯賽因天氣問題延期，令球員有機會回氣，今仗會更加落力，一開波即刻搶攻。利物浦近4次歐聯作客，有3次都喺上半場領先。
基羅納歐戰經驗不足
上季喺西甲一鳴驚人嘅基羅納，首次躋身歐聯舞台明顯力有不逮，5輪賽事1勝4負，唯一勝仗係主場擊敗弱旅施洛雲，上輪面對奧地利球隊格拉茨都要輸波。基羅納球員經驗不足頻頻犯錯，今屆竟然有4次「擺烏龍」失波，面對實力強橫嘅利物浦，相信半場都頂唔住。