今晚英超頭場之一，曼聯主場迎戰李斯特城。雙方剛於上月底英聯盃交鋒，當時曼聯大勝5比2，該仗係雲尼斯達萊首次以看守領隊身份領軍，咁啱今場係佢最後1次以呢個身份帶領球隊，肯定想「好頭好尾」，贏多場漂亮勝仗，預計會採取主攻戰術。翻查兩隊近3次對賽，曼聯全部上半場領先，首選半場主勝。（Now 621周日晚10時直播）
曼聯上月炒咗領隊坦哈格，由「雲佬」暫時執教，3戰取得2勝1和，最精彩一定係英聯盃贏李斯特城5比2，該仗連兩位長期低迷嘅中場卡斯米路及般奴費南迪斯都翻生，各自梅開二度，可見「雲佬」對發揮陣中球員潛能有啲心得，今晚再遇，戰局唔會有好大改變，「紅魔」勝算非常大。加上魯賓艾摩廉聽日正式成為曼聯主帥，意味今場係「雲佬」最後一次話事，當然想攞埋尾彩。
李斯特城防守脆弱
李斯特城近況低沉，除英聯盃不敵曼聯外，上場英超對住葉士域治，都要踢到補時先入波逼和對手，佢哋最大問題係防守脆弱，近4場比賽夾埋失咗11粒，作客回勇嘅曼聯，睇怕半場都頂唔住。文:Mic少